17
முழு மனிதன்
முன்னேறு திடமாய் முன்னேறு
முன்னேறு போகும் பாதையில்தான்
பின்னேறு பின் தொடரும்
கண்ணேறு பட்டாலும் கலங்காமல்
கள்ள மனம் கொண்டோரின்
தடைகளைத் தாண்டி முன்னேறு
முழு மூச்சில் விண்ணேறும் உனது சக்தி
உள்ளுணர்ந்து முன்னேறு பண்பாடும்
புகழ் பாடும் விண்ணெட்டும் புகழ் கூடும்
தீந்தமிழின் திறம் கொண்டு திடமான
மனம் கொண்டு முன்னேறும்
மானுடனே ஆவான் முழு மனிதன்
நாடகம்
மோனத்து இருந்த முன்னோன் கூத்தில்
உடுக்கையில் பிறந்தது ஓசையின் சுழலே
ஓசையில் பிறந்தது இசையின் உயிர்ப்பே
இசையில் பிறந்தது ஆட்டத்து இயல்பே
ஆட்டம் பிறந்தது கூத்தினது அமைவே
கூத்தில் பிறந்தது நாட்டியக் கோப்பே
நாட்டியம் பிறந்தது நாடக வகையே
கூத்த நூலைப் பார்த்து யாத்த நூல் கீழே
மோனத் தவமிருந்து மூழ்கி உள்கிடந்து
ஞானத் தவமிருந்து தனித்தே உள்கடந்து
ஒன்றித் தழைத்தே உள்ளுருவாகி வளர்ந்து
ஓங்காரநாதம் ஓங்கிப் புறப்பட்டே உள்
இருந்து ஒலித்துத் தொடங்கி நாடகம்
பிறந்தது அசைவின் மொழியே
அசைவு பிறந்தது மொழியின் வகையே
மொழி பிறந்தது மனதின் பிம்பமே
மனமொழி என்பது இதயத்தின் ஒலியே
மனம் என்பது இதயத்தின் இருப்பே
இருப்பு என்பது இறைவனின் அறையே
அறை என்பது அன்னையின் கருவே
கரு என்பது ககனத்தின் விதையே
விதை என்பது ககனத்தைப் பிளந்து
வெடித்துக் கிளம்பி காற்றை உள்
வாங்கிய விருட்ஷத்தின் அணுவே
அணுவென்பது ஆதிமூலமே